Contoh Teks Ceramah Maulid Nabi Bahasa Madura Singkat dan Mudah Dihafal

Para rabu sè samè moljâ

Sè mamolan ngèrèng bhâdhân kaulâ sareng panjhennengngan sadhâjâ ka’angghuy areng-sareng matombu taqwâ sareng iman ḍâ’ Ghustè Allah SWT sè ampon makon Nabbhi Mohammad mènangka rahmad ḍâ’ alam jhâghât ka’ḍinto. Akor sareng kabâḍâ’ân ka’ḍinto, sadhâjâna ummat Islam sè bâḍâ è dhunnya andhâddhiyaghi bulân Rabi’ul Awwâl mènangka mot-ngèmodhi arè bhâbhârrèpon Nabbhi Mohammad Saw kalabân mabâḍâ cemmacemma lalampa’an aghâma Islam.

Para rabu sè samè moljâ Parlo èkaghâli saè, Nabbhi Mohammad ka’ḍinto bhâbhâr neng bulân Rabi’ul Awwâl, kalerressan arè Sennèn, tangghâl 12 Rabi’ul Awwâl taon Ghâjhâ. Èsambhât taon Ghâjhâ amarghâ taon ka’ḍinto aropa’aghi taon kadhâddiyân sè langkong rajâ, èngghi ka’ḍinto bâḍâna gisru parjurit sè nètènè ghâjhâ sè èseppowè sareng Abrahan.

Kasebbhut ghâḍhuân usaha ka’angghuy marobbhu ka’bah kalabân maksod sopajâ rèng Arab ta’ bisa alampa’aghi hajji ḍâ’ Baitullah. Namong ḍâri maksot jhubâ’ kasebbhut Allah ta’ala ngotos mano’ Ababil sè ngèbâ bâto ka’angghuy asabbhil Abrahan kasebbhut. Alhamdulillah Abrahan ta’ tekka hajhât ka’angghuy marobbhu ka’bah kasebbhut.

Para rabu sè samè moljâ

Pramèla ḍâri ka’ḍinto, neng papangghiyân ka’ḍinto ngèrèng kita arammèyaghi bulân bhâbhârrèpon Nabbhi Mohammad kalabân semangat
ka’angghuy alampa’aghi suritauladan Nabbhi Mohammad sè langkong saè. Ngèrèng kita matombu rassa tarèsna ḍâ’ Rosulullah saw kalabân
alampa’aghi sadhâjâna tuntunan èpon.

Sabâtara saka’ḍinto pamator, manabi bâḍâ pamator sè korang parjhughâ, bhâdhân kaulâ nyo’on sapora! Nompa’ motor ka Mekkasan, mellèya eppot ḍâ’ Ghappora, saka’ḍinto pamator pongkasan sala lopot nyo’on sapora. 

Mator sakalangkong.

Billahi taufiq wal hidayah,

Wassalamu alaikum warohmatullahi wabarokaatu 

Editor: Kastolani Marzuki